真係唔知 但係眼見好似越來越多人都要走 總係有點思危的打算
一個失誤 本來有望的機會就這樣流走了
仍然努力中
講真, 以往真係冇乜收過 而且最窩心係佢地知我的慣性而選擇禮物 開心!
BTW, 仲有一個星期, 有心唔怕遲架... XDDDDD
上星期 臨別的客仔和我們約了今天下午到公司樓下的球場踢波
33度的高溫, 加上猛烈的太陽 兼且自知年紀已經不復初出道時咁 fit 再加上人腳懸殊 最初我地呢邊得四個人 客仔有成八九個 佢地呢個年紀只要有得玩 乜野環境之下都可以去得好放 下下要靠其他幾位運動部同事出力 而我就企晌後尾守下龍或者鏟下波咁大把
最後另外兩位同事加入, 叫做有得抖下 不過前後踢左一個半鐘, 其中超過半小時係我晌度扯蝦 再者雖然已經著番對波 boot 黎踢 不過最後兩隻腳趾公都起左水泡 對白襪蝕晒鞋塾 D 顏色入去 勁肉酸
不過, 差唔多成個月冇運動過 呢次算係操番下 慶幸對腳唔似得以前咁, 打一陣就酸軟晒 感恩囉
客仔已經放長假 但係大老細仍然要我地返去 係就話安排了一些檢討會以及撰寫來季計劃會議 但係都係開一個鐘多少少就收工 其餘時間都係晌度 hea 年終盤點, 都唔駛點一個星期啦 好似黎緊兩日咁, 所有會都唔關我事 但依然要返去坐, 勁無奈
早陣搞珠仔, 精英客仔當然沒有問題 反而基層客仔有部份調往山卡拉部門 欲哭無淚 不過今日都接連收到佢地搵到較好的機構轉 領班自然開心, 恭喜之聲亦一個接一個 不過, 一個運氣+表現各佔一半的遊戲 就預左會係咁
第五基本部隊又換領班 咁多年來, 做呢個部隊的領班都真係流動性大 頭幾年, 一年換最少三個 舊年的領班叫做好 d, 做足成年 不過之後跳槽走左 今年再改派一個經驗領班 年期夠啦, 決定享清福 即係話, 黎緊最後一年又係換新的領班 對成個部隊來講, 完全唔係好事 好似唔受重視和關懷咁
明年搞珠仔, 真係唔敢諗會出乜野結果就真
難得今年少有的男同事聚會 雖然唔係一年都唔知有沒有兩三次 但我唔希望呢次係最後一次
巴西, 你上半場一入左波就踢淡定波 結果下半場真係冇得 maan 再加上個人覺得西村球證有點偏幫荷蘭
唯有再等四年吧...
又完成了一壇野 星期五果日見到 D 表現真係一額冷汗 好彩尋日兩個都醒醒定定 有甩漏, 但最緊要觀眾唔覺眼
入場人數都算唔錯 不過似乎目標人士就唔夠多 有心來的, 又被經理們多次話 "一陣先再傾" 啦所打斷 到我得閒時, 佢地都走晒咯 配音皇后個仔有番黎 雖然以前晌公司佢真係超級麻煩 又軟皮蛇 配音皇后又成日都唔合作 不過見佢呢一刻除左同師妹拍拖外 總算未點學壞 就算數喇 反正我都管唔到佢咯
俾人話唔接挑戰 其實都唔想架 但係要知道 一來我地呢班只係玩遊戲波 對比人地成日咁打, 圍內又打街外又打 咁有戰鬥格 最終俾人狂數當然無癮啦 最弊係一陣俾人誤會我地無黎默契, 然後再加鹽加醋 到時傳到俾頂頭聽就真係頭痕 三來, 今年我地人都唔夠 最好打的都走了 全部運動人 + 我呢個柴娃娃, 頂晒窿經理肯放埋CA落黎先叫齊腳 三加三, 咁人地又覺得無癮啫
再者, 其他運動人平日有得玩都唔落黎 一係要開例會, 唔駛開時又點呢? 我呢 D 運動超低能的人都知, 檯波兩個人就得 (甚至將張枱拍埋牆玩反彈就仲可以一個人) 跑, 甚至可以一個人都得 但係彈彈波, 唔夠人加冇默契 好難成事的
平反的一天, 未知何時
大家仍須努力 向更多人 -- 特別係新一代解釋 1989 年的事情 至少這幾年我都有這樣對我的客仔做
都維持了三個多月的時間
歪媽話徒車錢, 又夜番 同事話屋企做功課先舒服 不過, 我呢 D 咁受引誘的人 晌屋企做功課, 睇下電視呢一點都已經死得 而且屋企成日長開電視, 又難找到一個比較靜的地方做 出去外面可能係唯一選擇
外面的好處, 有時做到實晒諗唔到野 起身行出去街外, 吹下風 突然之間又會諗到點寫落去 咁又可以打多幾個字 晌屋企, 無咁容易下下落到街吹風咩...
BTW, 第三份功課又黎緊 手腳又只好快一點了
雖然唔會問到一些甚麼 不過, 還是走去問了 亦當然又是公式的答案
佢所講的兩手準備 不論是真, 是假都好 總想起一句諺語話
行動過而不成, 總好過不行動過
除了耶穌基督可以帶領和安排你的前路外 為何要讓別人操控你的前途 而不是由自己去掌握?
近排個個都講微博 講到有幾流行有幾方便 又話邊個明星邊個名人都開戶口 繼 icq, msn, qq 等等後, 又一個網絡新文化
我本身都有 sina 的帳戶 其實要開一個微博 account 話咁易 不過, 我決定都係唔會開 唔關響呢度打微博會被 yahoo 刪除 或者又因為跟本沒法顧及太多部落 但係, 有一個好重要的原因 係令我唔會考慮
根本問題 係微博視伏器是設於國內 用的網名, 是以 cn 為尾的 再諗番下個零兩個月前梁詠琪在微博中留言談及過國內毒奶粉的評論 引起一陣討論 最後 gigi "主動" 把留言刪去 亦稱這個行為是個人的決定而非受外來因素影響 但係連這樣的網絡言論自由也不可容納 (更加不是什麼反政府反革命的言論) 都唔可以響屬於自己的微博中發表 甚至要自我審查所講的說話係咪可以出街 咁仲乜還要將個頭 "中" 埋去?
我唔想講唔打出黎, 係我的自由 我想講但其他人唔想見到我講呢 D 野, 就係干涉 只要我唔煽動其他人犯法的話 做乜要管制我?
早兩個月另一篇文章 道理其實都係一樣 不同的是, 當你諗住同佢一獲熟 又或者飛起左佢時 你任講佢都 gut 唔到你 唔通佢真係會去 ISP 度要求刪文? 問題係你已經入左呢個自我審查的地方時 就冇得好講啦
所以, 唔好煩, 微博呢家野, 唔駛預我, 咁就唔駛煩
早兩篇已經講過 一個晌國內架設的網站 一定會做好多 web watchdog 的工作 早幾日的例子 又一次證明這樣的事情
然而 我們亦要佩服不少人 一是直接了當的把真實的東西放上去 當 watchdog 做嘢時 又有很多變種方式來避過各種的刪除 再無法頂得順時 就以為索性變成只有設立賬戶才可以看 但新的留言, 仍然在這粗暴的行政手段下仍可流傳出來 連杜汶澤, 周柏豪等也來玩一番
勇於表達的人, 我向你們致意
真後知後覺
原來除了梁詠琪之外 連以往給人我行我素的杜汶澤 他的微博轉載了 gigi 的文章 同樣一分鐘內被刪去 相關的其他內容亦很快被刪
還要有一個 "微博小秘書" 來下達小字條話題裁唔適合所以刪
後來佢響呢度發了另一篇文作回應: http://hk.myblog.yahoo.com/tochapman1999/article?mid=63881&suc=1
回想一下 藝人為了爭取內地市場, 要使用微博來增加自己知名度 亦因而要委曲求全地接受內地的一套網絡 "規則" 不過, 用得咁辛苦, 何苦呢?
近日好多 FT 都考試 部份大學為了提供地方讓學生溫習 都開了夜讀室 好似 OU, BU 等咁 BU 今年仲第一次開 24 小時夜讀室
不過最後就變成了宿生的 common room 響自修室入面打 online game, 橋牌, 甚至開 party 直頭當係 common room 咁 有一次我直頭覺得忍受唔到 入去叫佢地靜 D 反而仲俾人話 "唔得架?" 我就費時同佢鬧喇 不過都好嚴正同佢地講, 呢度係圖書館, 唔係遊戲室 保持安靜係應份既云云
自私的心態, 真的枉為大學生 今天再回 BU, 都忍不住同當值職員講番 希望再餘下的時間可以睇緊 D 特別當越來越多人考完試 真係難保有人當左夜讀室係遊樂場...
可悲
識我的人都知我有一個嗜好 不過我就冇乜響呢度講
頭先做功課做到悶 晌 yahoo search 度八卦下啦 用我呢個嗜好做搜尋字 連到一個部落 說實在, 我早大半年都有上過呢個部落 當時係睇到話佢結婚當日和幾個兄弟一同穿同一款式的衣著 影出來的相也很好看 就不以為然
誰知今天再上去看, 順便看看有沒有講相關的題目 找到由自何 怎樣一入去看 有點奇怪 為什麼內容... 好像似曾相識的? 講及一些工作上的事, 人, 我都好像有印象 再看看前面的, 講到公司同樂日 入面的情節和內容, 和我知的都一模一樣 最後, 再看看再前兩三篇 講到去同事的婚禮 新人的相片一出, 我立即認到其中一人 係隔離部門的管理人士
照咁睇, 部落主人應該是隔離部門的同事所寫的 難怪, 我記得第一次見他時, 都估到佢應該和我有相同的嗜好 不過工作上和部門上沒有聯繫 所以從來也沒有認真談過
當然, 免得過我也不會相認的 因為呢度寫左我呢邊公司部門的事 傳開去都幾頭痕
不過想不到原來佢對嗜好都追得幾貼喎
長期以來, 基於感情因素大於實際因素 本人長期都支德國隊
由Klinsmann, Völler, Matthäus 年代 再經歷 Kahn, bierhoff 年代 到宜家 Ballack, Klose, Schweinsteiger, Podolski 等 對德國隊的喜愛, 沒有一絲的減退
不少人都常說德國隊打得不積極 既不華麗, 又非全能 然而日耳曼的精神 無時無刻都發揮出來
從來都不被重視 但每次一關又一關的闖進 總令不喜歡者大跌眼鏡
昨天大炒阿根廷四球後 已經最少去回上屆的成果 很期望今年能再接再厲 讓隊徽上的三星, 變成四星
加油!
(PS: 香港負責翻譯的大哥們, 可否找一個稍為懂點點德文的 然後為德國的球星們改番合適的名稱? 雖然我極唔喜歡大陸的譯法, 但人家最少是以德語的拼音去譯呢 卡恩變簡尼, 科拿變禾拉, 奈亞變紐亞, 費拉迪克變成費德歷治, 哇靠....)
好遲先明白呢張 sticker 的意思
不過多得曾蔭權, 又叫人記得呢件事
同意陶君行所講, 票數比遊行人數更實際反映有幾多人支持民主的理念
明天516, vote
